Behotsik

  • Behotsik: 10 urte, hamaika lagun, Euskalduna Jauregian

    Behotsik: 10 urte, hamaika lagun, Euskalduna Jauregian

    Denbora daramagu hau dena prestatzen. Eta horretan darraigu. Denbora daramagu hau isilik mantendu ezinik. Baina heldu da eguna dena kontatzeko. Datorren uztailaren 2an Bilboko Euskalduna Jauregira goaz gure 10 urteak ospatzera. Heldu da Behotsik: 10 urte, hamaika lagun.

    Jakin dakizuenez, 2021eko abuztuan 10 urte bete genituen, eta 2021-2022 denboraldiak urteurren honen ospakizun gisa balio izan digu. Denboraldi berezi honen amaiera izango da Behotsik: 10 urte, hamaika lagun kontzertu hau. Gainera, Euskalduna Jauregiko Auditoriumean izateak are bereziagoa egingo du kontzertua, izan ere, gure 10 urteko historian Bilboko oholtza enblematiko honetara igotzen garen lehen aldia izango baita.

    Gala-kontzertu formatua izango duen ekitaldi honen haria orkestraren ibilbideari errepasoa egitea da, euskal musikaren historian zehar bidaia bat eginez: Guridi, Arriaga edo Ravelen jatorri klasikoetatik hasi Aneguria edo Gatibu bezalako egungo artisten musikara heldu arte, Oskorri edo Itoiz bezalako talde historikoetatik igaroz.

    10 urte, hamaika lagun

    Badago ilusio gehiago egiten digun zeozer: kontzertu honetan ez gara bakarrik egongo. Egun honetan orkestratik igaro den hamaika lagunekin agertokian berriro elkartzeko aukera izango dugu, baita 10 urte baino gehiagoko ibilbidean lan egin dugun taldeekin eta zenbait artista gonbidaturekin biltzeko ere. Datozen asteetan zehar gure sare sozialetan haien berri ematen joango gara, beraz, adi ibili.

    Sarrerak bihar (maiatzak 12) jarriko dira salgai, goizeko 12:00etan, Euskalduna Jauregiko webgunean, 8 eta 12 €-ko prezioan. Gure bazkideek %100-eko deskontua izango dute beraien sarreran. Horretarako, Euskalduna Jauregiko txarteldegietan erosi beharko dute sarrera, beraien datuak eman behar dituztelarik. 12 urte beherakoek ere %20-ko deskontua izango dute.

    10 urte hauek zuetako bakoitzarekin ospatu nahi ditugu, beraz, elkar ikusiko dugu datorren uztailaren 2an arratsaldeko 19:30ean Euskalduna Jauregian. Zatoz eta elkarrekin ospatu dezagun batzen gaituena, musika hain zuzen ere.

    Behotsik

    , ,

  • Zornotzako Itunaren 150. urteurrena ospatuko dugu

    Zornotzako Itunaren 150. urteurrena ospatuko dugu

    Datorren maiatzaren 24an Amorebieta-Etxanoko Zornotza Aretoan izango gara, Zornotzako Itunaren 150. urteurrena ospatzeko herrian antolatu duten egitarau zabalaren barruan.

    150 urte igaro dira Bigarren Gerra Karlistari amaiera emateko asmoz Zornotzako Ituna sinatu zenetik. Hitzarmen hau 1872ko maiatzaren 24an sinatu zuten, liberalen partetik, ordura arte Espainiako gobernuaren presidente zen Francisco Serrano jeneralak, eta karlisten aldetik Bizkaiko Foru Aldundiaren ordezkari ziren Fausto Urkizuk eta Juan E. Oruek, beren izenean eta Antonio Arginzoniz jaunaren izenean. Azkenean, liberalek eta karlistek itun hau onartu ez zuten arren, gerrak jarraitu zuelarik, negoziazio saiakera hau gertaera historiko garrantzitsua izan zen azken Karlistaldi honetan.

    Hori dela eta, udalerriak ez du alde batera utzi nahi efemeride esanguratsu hau, eta denboran atzera egin nahi du kultura-jardueren programa zabal baten bidez, maiatzaren 1etik 24ra luzatuko dena. Programa honetan, adin guztiak hartuko dituen publiko batengana iritsi nahi dute, formatu desberdinen bitartez. Programatutako jardueren artean, hitzaldiak, antzezlanak, haur eta gazteentzako jarduerak, erakusketa bat, liburu bat eta, nola ez, prestatzen ari garen kontzertua ere egongo da.

    Zornotzan kontzertua, bi zornotzarren ondoan

    Maiatzaren 24an ez gara bakarrik egongo. Zornotzako Itunaren 150. urteurrena ospatzen dugun kontzertu berezi honetan bi zornotzar handi izango ditugu lagun.

    Alde batetik, lagun zahar bat izango dugu zuzendari lanetan. Ilusio handia egiten digu Aritz Labradorrekin berriro lan egiteak, 2019ko Musika-Música jaialdian egin genuen bezala, 10 urte hauetan eman dugun kontzerturik onenetakoa eskaini genuelarik. Errepertorio polita baina zaila dugu aurretik, baina entseguek aurrera egin ahala, Aritz gure onena ateratzen dabil.

    Bestalde, Elisene Alzola biolinista izango dugu, prestatzen ari garen errepertorioko pieza batean bakarlari gisa arituko dena. Elisenek Leipzigeko (Alemania) Hochschule für Musik und Theater Leipzig Goi Mailako Kontserbatorioan egin zituen ikasketak. Ondoren, Leipzigen master artistiko bat egin zuen Mariana Sirburen zuzendaritzapean. Gaur egun Euskadiko Orkestraren eta Bilbao Orkestra Sinfonikoaren kolaboratzailea da.

    Kontzertua maiatzaren 24an, asteartea, arratsaldeko 20: 00etan izango da Amorebieta-Etxanoko Zornotza Aretoan. Sarrerak jada salgai daude Zornotza Aretoaren webgunean, 3 €-ko prezioan.

    Behotsik

    ,

  • Deustuko Unibertsitatearen omenaldia Javier Elzo irakasleari

    Deustuko Unibertsitatearen omenaldia Javier Elzo irakasleari

    Oraingoan ezohiko kontzertu batekin gatoz. Izan ere, datorren maiatzaren 6an Deustuko Unibertsitateko Donostiako campusak Javier Elzo Soziologiako katedradun emerituari egingo dion omenaldian parte hartuko dugu.

    Omenaldia jasoko duen Javier Elzo irakaslea Ludwig van Beethovenen zale amorratua eta aditua da, Beethoven eta oro har musika klasikoaren inguruan artikulu ugari idatzi dituelarik. Horregatik, Beethovenen zenbait obra joko ditugu ekitaldi honetan.

    Kontzertu berezi hau duela bi urterako prestatu genuen, baina pixkanaka atzean uzten ari garen pandemia honek atzeratzea ekarri zuen. Baina azkenik posible da kontzertua ospatzea eta horrela egingo dugu datorren maiatzaren 6an, ostirala, arratsaldeko 18:00etan, Deustuko Unibertsitateko Donostiako campuseko Loiola Centrumen.

    Ekitaldia pribatua izango da. Hala ere, Deustuko Unibertsitateak izena emateko inprimakia jarri du bere webgunean, maiatzaren 5a baino lehenago bete behar dena.

    Behotsik

    , ,

  • Betiko musika Ea laukotearekin

    Betiko musika Ea laukotearekin

    Gure 10. urteurrenaren ospakizunekin jarraituz, emango dugun hurrengo kontzertua aurkeztu nahi dizuegu. Oraingo honetan, ez da orkestra osoaren kontzertua izango, Borja, Unai, Karmele eta Aitziber gure kideek osatzen duten laukotearen kontzertua baizik. Formatu horretan Bilboko Udalak antolatutako Betiko Musika de Siempre programan parte hartuko dugu datorren martxoaren 26an.

    Bilboko Udalak, urtarrilaren 29an, otsailaren 12an eta 26an, martxoaren 12an eta 26an eta apirilaren 9an (larunbatak), Betiko Musika de siempre musika-programaren beste edizio bat abian jarri du Otxarkoaga auzoan. Kontzertuak urte askotan gure entsegu lekua izan den Otxarkoagako Udaltegian izango dira eta bertan boleroak, Ebroko Erriberako abesti herrikoiak, habanerak edo otxoteak entzun ahal izango dira, honako talde hauen eskutik: Bolero’s 4; Voces del Ebro; Los chimberos; Trio Veracruz; Ea Laukotea – Behotsik Orkestrako Hari Laukotea; eta Otxote Bilbao Argia.

    Behotsik orkestraren izenean, Ea Laukotea izango dugu Betiko Musika de siempre ekimen honetan. Borja Mollá (bibolina), Unai Ibáñez (bibolina), Karmele Elizaran (biola) eta Aitziber Elizaranek (txeloa) osatutako laukote honek formatu txikiko kontzertu bat eskainiko du, estilo desberdineko errepertorioarekin eta publiko guztiarentzat eskuragarria.

    Ziur gaude ordezkari aproposak bialdu ditugula, beraz, ez ezazu galdu Behotsik orkestrako Ea Laukotaren kontzertu hau datorren martxoaren 26an, arratsaldeko 18:00etan, Bilboko Otxarkoagako Udaltegian. Sarrera doakoa izango da edukiera bete arte.

    Behotsik

    ,

  • Bueltan dira Iparraldeko Haizeak

    Bueltan dira Iparraldeko Haizeak

    Gure 10. urteurrena ospatzen jarraitzen dugu, eta oraingoan berri oso pozgarri batekin gatoz: Iparraldeko Haizeak bueltan dira. Pasa den otsaila eta martxoan estreinatu genuen Iparraldeko Haizeak ikuskizuna errepikatuko dugu, oraingo honetan Torrelavega eta Santanderren kontzertu banarekin.

    Gogoratzen ez denarentzat, Iparraldeko Haizeak ikuskizuna Borja Mollá Moral gure kideak eta Inazio López Ochoak idatzitako zartzuela da, antzerki musikala, zartzuela eta folklorea uztartuz, musika-ikuskizun berritzaile bat aurkezten duena, musika haritzat duen historia baten bidez industria-iraultza aurkitzera daramana.

    Santander, 1897. Euskal arrantza-ontzi bat badian hondoratu da. Lagun bakarra atera da bizirik, Mikel, San Rafael Ospitalean konorterik gabe dagoen itsasmutil gaztea. Esnatzerakoan, hura zaintzen dauden mojak hitzik esan eta esaten zaion ezer ere ulertzen ez duela ohartzen dira. Hala ere, laster ikusiko dugu istripuaren trauma edo ondorioak gauzatuta dirudiena azalpen errazagoa duela: Mikel euskaraz baino ez da mintzatzen. Hori, ordea, ez du oztopo izango Santanderreko familia aberatsenetako baten zerbitzura mandatari lanetan jartzeko eta XIX. mende amaierako gizarte industrial zurrunbilotsuaren kontrasteak zuzenean ikusteko.

    Aurreko emanaldietan bezela, oraingoan ere gure ondoan Coro Joven de Santander abesbatza izango dugu. César Marañónek zuzendutako abesbatza hau, kalitatezko gazte abesbatza bat eratzeko eta Kantabriak zeukan gabeziarekin amaitzeko helburuarekin jaio zen 2017an.

    Torrelavegan eta Santanderren

    Proiektua Torrelavega eta Santanderren gauzatuko da, azaroaren 14an Torrelavegako Concha Espina Udal Antzokian eta azaroaren 21ean Santanderreko Palacio de Festivales jauregian.

    Torrelavega

    Azaroaren 14an, igandea, arratsaldeko 19:30ean, Torrelavegako Concha Espina Udal Antzokian.

    Sarrerak jadanik salgai daude Concha Espina Udal Antzokiko webgunean, 8€ eta 12€ arteko prezioan.

    Santander

    Azaroaren 21ean, igandea, arratsaldeko 19:00etan, Santanderreko Palacio de Festivales jauregiko Argenta aretoan.

    Azken sarrerak salgai daude Palacio de Festivales jauregiko webgunean, 10€ eta 15€ arteko prezioan.

    Behotsik

    , , , ,

  • Musika balkoietatik

    Musika balkoietatik

    Datorren igandean gure 10. urteurrena ospatzen ari garen denboraldi honetako lehenengo kontzertua emango dugu, Musika Balkoietatik ekitaldiaren barruan. Emanaldi berezi honetan, Etorkizuna Musikatan haur-orkestra izango dugu lagun, Bilboko Ibaiondo barrutiko kultura desberdinetako ume eta nerabeek osotzen dutena.

    Ekitaldia Norai elkarte hezitzaile, ekintzaile eta humanizatzaileak antolatu du, zeinek, besteak beste, Etorkizuna Musikatan proiektu sozio-hezitzailea eta orkestrala jarri du abian, musikak kolektibo pluralak batzeko eta balio pertsonalak, komunitarioak eta kulturartekoak garatuz gizartea hezteko duen gaitasuna erakutsiz. Gainera, Fair Saturday fundazioak laguntzen du, hainbestetan parte hartu dugun kultur mugimenduak, Barreras Invisibles ekimenaren barruan.

    Musika Balkoietatik arrisku larrian dauden Afganistango Gazte Orkestra eta Zohra Ensemble, Afganistango Emakumezkoen Orkestra, haur eta gazte orkestren aldeko ekimena izango da. Borondatez egiten diren ekarpen ekonomikoak orkestra horiei laguntzera bideratuko dira oso-osorik, Ahmad Sarmast orkestra zuzendariaren bitartez.

    Balkoietatik, auzora

    Ekimen musiko-sozial hau Bilbiko plazan egingo da, eta berezitasun bat izango du: musikarietako batzuk plazako balkoi batzuetan egongo dira, jabeek beren borondatez lagata. Etxea pertsonaren eta familiaren intimitatearen sinbolo pribilegiatua da. Espazio horretan, balkoiak kanporako, kalerako eta auzorako irekiera irudikatuko luke. Balkoira irtetea, pertsona-familiarra kolektibo-auzokora bilakatzea bezala ulertuko genuke. Horrela, gure etxeak auzora irekitzea ikusarazi nahiko genuke; pertsonala eta familiakoa dena, desberdina, anitza eta, aldi berean, hurbilekoa bihurtzea.

    Musika Balkoietatik pertsona, familia, kolektibo eta elkarte askok auzoan egiten duten lanari balioa eman nahi dio, haien inplikazioarekin gizartea eraldatzen lagunduz. Era berean, aniztasuna elkarrekintzan jarritako aberastasun gisa ikusarazi nahi du.

    Behotsik Orkestrarentzat berezia da horrelako ekitaldi bat gure 10. urteurrenean egitea, eta Etorkizuna Musikatan haur orkestrako neska-mutilekin izan ditugun entseguen ondoren, ziur gaude galdu ezin duzuen ekitaldia dela. Horregatik, datorren igandean, urriak 17, 12:00etan Bilboko Bilbi plazara gonbidatzen zaituztegu.

    Behotsik

    , , ,

  • Iparraldeko Haizeak, Bilbon eta Santanderren

    Iparraldeko Haizeak, Bilbon eta Santanderren

    Santander, 1897. Euskal arrantza-ontzi bat badian hondoratu da. Lagun bakarra atera da bizirik, Mikel, San Rafael Ospitalean konorterik gabe dagoen itsasmutil gaztea. Esnatzerakoan, hura zaintzen dauden mojak hitzik esan eta esaten zaion ezer ere ulertzen ez duela ohartzen dira. Hala ere, laster ikusiko dugu istripuaren trauma edo ondorioak gauzatuta dirudiena azalpen errazagoa duela: Mikel euskaraz baino ez da mintzatzen. Hori, ordea, ez du oztopo izango Santanderreko familia aberatsenetako baten zerbitzura mandatari lanetan jartzeko eta XIX. mende amaierako gizarte industrial zurrunbilotsuaren kontrasteak zuzenean ikusteko.

    Hauxe da datorren otsailaren 28an Bilbon eta martxoaren 13an Santanderren Iparraldeko Haizeak ikuskizun berrian ikusi ahal izango duguna. Borja Mollá Moral gure kideak eta Inazio López Ochoak idatzitako zartzuela honek, antzerki musikala, zartzuela eta folklorea uztartuz, musika-ikuskizun berritzaile bat aurkezten du, musika haritzat duen historia baten bidez industria-iraultza aurkitzera daramana.

    Iparraldeko Haizeak proiektua Bilboko Udalak, Kultura Sailaren bidez, eta Santandarreko Udalak, Santander Creativa Fundazioaren bidez, antolatutako Bertatik Bertara laguntza programan hautatua izan zen pasa den uztailean. Hasierako ideia 2020ko abenduan gauzatzea zen, baina Covid-19ak gauzatutako pandemiak dena atzeratzea ekarri du eta datorren otsailaren amaierararte itxaron beharko dugu ikuskizun berri hau oholtza gainera ekartzeko. Bertatik Bertara programaren sustatzaileen laguntzaz gain, Laboral Kutxaren babesa izango dugu berriro ere, beraz, hemendik gure eskerrik beroenak helarazi nahi dizkiogu proiektu hau aurrera ateratzen laguntzegatik eta bizitzen ari garen egoera honetan kulturaren aldeko apustua egiteagatik.

    Gure ondoan Coro Joven de Santander abesbatza izango dugu. César Marañónek zuzendutako abesbatza hau, kalitatezko gazte abesbatza bat eratzeko eta Kantabriak zeukan gabeziarekin amaitzeko helburuarekin jaio zen 2017an.

    Iparraldeko Haizeak bezala, Bilbotik Santanderrera

    Proiektua Bilbon eta Santanderren gauzatuko da, otsailaren 28an Bilboko Campos Elíseos Antzokian eta martxoaren 13an Santanderreko Palacio de Festivales jauregian. Proiektuak kontzertua bera biltzen du, egun bakoitzeko arratsaldean ospatuko dena eta osasun egoerak gauzatutako edukiera murriztapenak direla eta streaming bidez ere zabalduko dena, eta bestalde, kontzertuaren eguneko goizean, mahaingurua antolatuko da hiri bakoitzeko adituekin, arratsaldean ikuskizunean gertatuko den guztia ulertzeko aukera emateko.

    Bilbao

    Otsailaren 28an, Bilboko Campos Elíseos Antzokian.

    Mahai-ingurua: goizeko 12:30ean, Kupula aretoan. Sarrerek 10€-ko prezioa izango dute.

    Kontzertua: arratsaldeko 18:00etan, Teatro aretoan. Sarrerek 12 eta 17€ arteko prezioa izango dute.

    Bi emanaldietara joan nahi izatekotan, sarrera sorta berezia eskuragarri egongo da, goizeko eta arratsaldeko sarrerekin, 19 eta 24€ arteko prezioarekin.

    Sarrerak aurki jarriko dira salmentan Campos Elíseos Antzokiko webgunean eta txarteldegian.

    Campos Elíseos Antzokiko lagunek %15-eko beherapena izango dute (lehen 30 sarrerek) eta Behotsik Orkestrako bazkideek %33-ko beherapena izango dute. Beherapena duten sarrerak lortzeko antzokiko txarteldegira hurbildu beharko zarete, baita bi emanaldietarako sarrera sorta erosteko ere.

    Santander

    Martxoaren 13an, Santanderreko Palacio de Festivales jauregian.

    Santanderreko emanaldietarako informazio guztia zehaztu bezain laster eguneratuko dugu gure webgune eta sare sozialetan.

    Behotsik

    , , , , ,

  • Agertokietara bueltan gatoz, #BilbaoUdazkena2020 ekimenean

    Agertokietara bueltan gatoz, #BilbaoUdazkena2020 ekimenean

    Bueltan gatoz. Agertokietara bueltan gatoz. Pasa den martxoaren 7an Bilboko Musika – Música jaialdian gure azken kontzertua eman ondoren, musika egingo dugu berriro, zuen aurrean. Ekainean ospatu behar zen Bilboko Gau Zurian parte hartuko dugu, oraingo honetan Bilboko Udalak antolatutako #BilbaoUdazkena2020 ekimenaren barruan, asteburu honetan emango ditugun kontzertu multzoarekin.

    Bilboko Udalak, COVID-19 delakoaren pandemiak gehien eragin duen lanbideetako bat den kultura-sektoreari laguntzeko apustuarekin jarraituz, #BilbaoUdazkena2020 kultura-ekimenaren barruan, hainbat ikuskizun antolatu ditu udagoieneko asteburuetako gauetarako: musika, argiak, antzerkia, dantza eta historia, Bizkaiko hiriburuko hainbat tokitako protagonista.

    Ostiralean, hilak 2, eta larunbatean, hilak 3, Udalak zazpi ikuskizun antolatu ditu musika, argiak, antzerkia, dantza eta historiarekin, uriko hainbat gunetan banatuta: Eleiz Museoa, Enkarnazio Eliza, Zabalguneko eraikina, Azkuna Zentroa, Euskalduna Jauregia eta Guggenheim Bilbao Museoa.

    Ikuskizun horien artean, Hiri Baten Sinfonia dago, Bilboko Euskalduna Jauregian ospatuko dena, zeinetan ilusio handiz parte hartuko dugun. Bertan, zuzenean interpretatuko dugu Dvoraken Mundu Berriaren sinfonia, eta Bilborik arruntenaren irudiak proiektatuko dituzte.

    Ikuskizunak 15 minutuko iraupena izango du, eta emanaldiak egongo dira ostiral eta larunbatean, 20:30ean, 21:30ean eta 22:30ean. Saioa bakoitzak 200 pertsonako edukiera izango du, eta beharrezkoa izango da sarrera aurkeztea. Sarrerak doakoak dira eta 657 595 575 eta 688 689 000 telefonoetan edo Euskalduna Jauregiko eta Guggenheim Bilbao Museoko webguneetan eska daitezke, urriaren 1etik aurrera.

    #BilbaoUdazkena2020 garatzeko, osasun-agintariek unean-unean ezarritako segurtasun-protokolo guztiak jarraituko dira, eta zorrotz aplikatuko dira kultura- eta jai-ekitaldiak egiteari, osasun publikoa bermatzeko beharrezkoak diren mugei eta espazio publikoan aire zabaleko jarduerak nahiz ekitaldi jendetsuak egiteko pertsona kopuruari buruzko gomendioak. Hori guztia, kultur eragileek eta ekitaldi guztietako ikus-entzuleen segurtasuna bermatzeko asmoarekin.

    Espero dugu ostiralean edo larunbatean berriro elkar ikustea, segurtasun neurri guztiekin, eta bizitza honetan beharrezko dugun honetaz gozatzea, musikaz gozatzea, kultura ere segurua dela frogatuz. Laster arte!

    Behotsik

    , , ,

  • Paris, Musika – Música 2020 jaialdiko helmuga

    Paris, Musika – Música 2020 jaialdiko helmuga

    Aurten ere badator Bilbao 700 Fundazioak antolatutako Musika – Música 2020 jaialdia, datorren martxoaren 5etik 8ra arte Bilboko Euskalduna Jauregian ospatuko dena.

    Oraingoan, “Destino París” izenburupean, jaialdiak Pariseko hiria izango du ardatz. Lau momentu historikok bilakatu zuten Paris lehen mailako kultura-zentro eta nazioarteko topagune, Parisek eskaintzen zizkien aukera eta askatasunek erakarrita, Europa guztiko artistak iritsi zirelarik.

    Batetik, XVIII. mendea, bere gortesau-musika, balet eta pas de basques delakoarekin. Hor aurkituko ditugu François Couperin (1668-1733) eta Jean Philippe Rameu (1683-1764). Bestetik, XIX. mendea, zeinetan Paris izan baitzen artista eta musikari europarren jomuga eta topalekua (eszenikoa eta instrumentala). Horren erakusgarri ditugu Rossini (1792-1868), Meyerbeer (1791-1864), Donizetti (1797–1898) eta Bellini (1801-1835). Verdik (1813-1901) berak ere arrasto sakona utzi zuen bere Pariseko egonaldian.

    Frantziak Prusiaren aurkako gerran izandako porrotak (1871) markatuko du XIX. mendetik XX. menderako trantsizioa, eta, paradoxikoki, garai horretan botako dituzte errepublikanismoak eta demokraziak beren erroak Frantzian behin eta betiko. Frantziako musikak eginahalak egin zituen Alemaniako musika miretsiaren (eta bekaiztuaren) mailara iristeko. Baina ahalegin horretan oztopo bihurtu zen Wagnerrek sortzen zuen lilura XIX. mende amaierako konpositore frantsesengan. Erronka horri erantzuten lehenak Camille Saint-Saëns eta Gabriel Fauré izan ziren. Azkenik, XIX eta XX. mendeak, Arriaga (1906-1826), Usandizaga (1887-195 ), Aita Donostia (1886-1956) eta Guridiren (1886-1961) ikuspegitik.

    Behotsik Orkestrak martxoaren 7an kontzertua emango du Bilboko Euskalduna Jauregiko Kioskoan, 21:00etan. Oraingo honetan, Bizet, Fauré, Saint-Saëns eta Guridiren doinuak prestatu ditugu kontzertu honetarako.

    Aurreko urteetan bezela, kontzertu berezi honetarako zuzendari gonbidatua izango dugu. Kasu honetan, Leonardo Moyano izango dugu zuzendari Musika – Música 2020 jaialdiko kontzertu honetan.

    Gogoratu kontzertura sartzeko beharrezkoa izango dela egun horretako eta ordu-tarte bereko ordainpeko kontzertu baterako sarrera erostea. Sarrerak salgai dituzue Bilboko Ensanche Eraikinean, Euskalduna Jauregiko txarteldegietan eta Kutxabanken zerbitzu anitzeko kutxazainetan. Kontsulta ezazu informazio guztia Musika – Música 2020 jaialdiaren webgunean.

    Behotsik

    , ,

  • Mundu berri baten aldeko sinfonia: kontzertu irekia

    Mundu berri baten aldeko sinfonia: kontzertu irekia

    Oraingoan sorpresa berezi batekin gatoz. Jakin dakizuenez, datorren astean Fair Saturday 2019 ospatuko dugu, prestatzen ari garen Emakumeak eta artea: itzaletatik argitara kontzertuarekin. Baina Fair Saturday eguneko goiza zurekin igaro nahi dugu, eta horretarako kontzertu ireki bat antolatu dugu.

    Kontzertu irekia? Bai! Ideia hauxe da: hartu ezazu zure instrumentua, ekarri zure partiturak, gure orkestrarekin bat egin eta egin dezagun musika! Horrela, Fair Saturday 2019 egun hau jarriko dugu erakusleihoan, eta musikak, eta kulturak orokorrean, behar duen garrantzia eskatuko diogu gizarteari. Kontzertu honetarako esloganak dioen bezala, ekar ezazu zure arma eta erein ezazu zure hazia.

    Kontzertu edo esperimentu berezi hau Bilbon egingo dugu, Zubiarte merkataritza zentroan, azaroaren 30eko goizeko 12etan, eta egun honetan Antonín Dvořáken Mundu Berriaren Sinfoniaren 4. mugimendua joko dugu. Eta nor etorri daiteke? Mundu guztia gonbidatuta dago!

    Musika instrumentu bat jotzen baduzu, gure orkestran lekua izango duzu. Hartu zure instrumentua eta gurekin bat egitea baino ez duzu. Esteka honetan aurki dezakezu informazio guztia.

    Instrumenturik jotzen ez baduzu ere, etorri egin behar duzu! Esperimentu honetan parte hartzea berezia izango da, kontzertuak berak suposatzen duen garrantziaz gain (gizarteak musika eta kulturaren bitartez mundu berri bat eraikitzen) egun horretan sorpresa ugari egongo direlako. Ez dizugu pista handirik emango, baina etor zaitez musika egiteko gogoekin.

    Beraz, bertan espero zaitugu, zure instrumentuarekin, edo ikusle moduan, baina eraiki dezagun mundu berri bat, gure armekin, gure instrumentuekin, milaka hazi ereiteko. Gogoratu, azaroaren 30ean, goizeko 12etan, Zubiarte merkataritza gunean.

    Informazio gehiago

    Behotsik

    , ,

  • Emakumeen eta beraien artearen Fair Saturday

    Emakumeen eta beraien artearen Fair Saturday

    Aurreko urteetan bezela, aurten ere datorren azaroaren 30ean ospatuko den Fair Saturday 2019 ekimenean parte hartuko dugu. Oraingo honetan, emakume musikari eta artistaren irudia nabarmendu nahi izan dugu, eta horretarako, “Emakumeak eta Artea: itzaletatik argitara” kontzertua prestatu dugu. Ongizatezko kontzertua izanik, egun horretan Deustuko Unibertsitateko Paraninfoan bildutako diru guztia Alboan GKEarentzat joango da.

    “Emakumeak eta Artea: itzaletatik argitara” kontzertuak emakumea taula gainean jarriko du. Historian zehar, musikaren munduan ere, emakumea bigarren maila baten egon izan da beti, nahiz eta bere garrantziak eta kalitateak beste leku bat merezi duen. Horregatik, aspaldiko eta gaur egungo musikariak ekarri nahi izan ditugu kontzertu honetan. Anne Dudley, Florence B. Price, Rachel Portman, Lady Gaga, Pinar Toprak eta Lisa Gerrarden musika joko dugu, eta Nerea Alberdi eta Paula Olaz euskal konpositore gazteak gurekin izango ditugu beraien obrak zuzentzeko.

    Baina dena ez da musika izango. Emakume artista ere presente egongo da, eta kontzertuan zehar emakume gehiago igaroko dira oholtzatik, bakoitza bere artea erakutsiz: pintura, dantza… Pixkanaka iragarriko ditugu nortzuk egongo dira gurekin.

    Fair Saturday mugimenduaren baitan

    Fair Saturday artistek eta kultura-elkarteek garatutako kultura eta giza izaerako mugimendu globala da. Artista eta kultura-elkarte hauek azaroaren azken larunbatean modu masiboan jardungo dira ekitaldi bakoitzarekin GKE edo proiektu sozial bat bultzatuz.

    Aurreko urteetan Ha Ha Tay – son risas de Gandiol edo Vass Sanfilippo Euskadi bezalako elkarteekin lan egin ondoren, aurten Jesusen Lagundiak bultzatutako Alboan elkartearekin bat egingo dugu. Elkarteak munduan desberdinkeriak sortzen dituzten bidegabekeriak salatuko dituzten herritar globalak prestatzeko lan egiten dute, guztion ongia sustatuz eta bai tokian-tokian bai globalki pobrezia sortzen duten egiturak eraldatuz.

    Aipatu behar dugu, Fair Saturdayk beti eman digun laguntzaz gain, aurten Laboral Kutxa ere egongo dela gure ondoan, kontzertu hau aurrera eramateko behar den azpiegitura guztiarekin lagunduz.

    Beraz, ez ezazu sorpresaz beterik egongo den kontzertu hau galdu, eta etor zaitez Fair Saturday 2019 egunera, datorren azaroaren 30ean, arratsaldeko 7:30ean, Bilboko Deustuko Unibertsitateko Paraninfora, elkarrekin gure gizartean hain beharrezkoa den kultura bultzatzera.

    Behotsik

    , , ,

  • Itsasaldi musikala: Asturiasera goaz

    Itsasaldi musikala: Asturiasera goaz

    Esan genizuen denboraldi amaiera ez zela makala izango, eta hori ikus dezazuen, berri polit batekin gatoz. Asteburu honetan, Asturiasera bidaiatu eta Llanesen kontzertua emango dugu gure itsasaldi musikal honetan.

    Orkestrak dituen ia zortzi urte hauetan, behin baino ez gara Euskal Herritik kanpora irten. Hori 2017an gertatu zen, La Flauta Mágica. Tu Primera Ópera ikuskizunarekin eta JOECOM orkestrako gure lagunekin batera Madridera joan ginenean. Denboraldi potente honen ondoren, eta egin dugun lan gogorra ospatzeko, antzeko zerbait egin nahi genuen kurtsoa amaitzeko, eta hainbat aukera aztertu ondoren, azkenean, Asturiasera joatea erabaki genuen, Llanesera hain zuzen ere.

    Llanes Asturiaseko ipar-ekialdean dagoen udalerria edo conceyua da, Kantabriatik gertu. Herriak duen ondare artistikoaren artean, Llaneseko Kasinoa nabarmentzen da, eta bertan emango dugu kontzertua larunbatean bertan, uztailak 6, arratsaldeko 7etan. Kontzertua itsalsaldi musikala izango da, Asturias eta Euskal Herria lotzen dituen itsasoan zehar, eta Arriaga edo Mozart bezalako konpositoreen obrak interpretatuko ditugu.

    Baina oraingo honetan, ez da dena lana izango. Larunbatean emango dugun kontzertua prestatzeko lan egiteaz gain, aisialdirako ere denbora izango dugu, orkestra honetan hain garrantzitsua den familia edo lagun izaera hori sendotzeko. Horregatik, bertako inguru ederrak ezagutzeaz gain, zenbait ekintza egingo ditugu, baita surfa praktikatu ere. Ziur une atseginak igaroko ditugula.

    Beraz, nahiz eta etxetik urrun egongo garen, animatzen bazarete, gonbidatuak zaudete larunbateko kontzertura, itsasaldi musikal honetaz gozatzera.

    Behotsik

    ,

  • Manga musika Bilboko Manga eta Japoniar Kultur Azokan

    Manga musika Bilboko Manga eta Japoniar Kultur Azokan

    Datorren ekainaren 21etik 23ra bitartean, V. Bilboko Manga eta Japoniar Kultur Azoka ospatuko dute Bilboko Euskalduna Jauregian, eta bertan parte hartuko dugu ekainaren 22an arratsaldeko 6etan emango dugun kontzertuarekin.

    Ez da manga eta japoniar kulturaren munduan murgiltzen garen lehenengo aldia. Izan ere, pasa den denboraldian MoTsuKoRa elkarteak antolatutako XX. Manga eta Anime Jardunaldietan parte hartu genuen, eta berriki, pasa den urrian, Amorebietako Mangamore jaialdian ere kontzertua eman genuen.

    Jende askorentzat guztiz ezezaguna izan daitekeen musika biltzen dute anime eta bideojokoek, baina behin ezagututa, abesti oso interesgarriak aurkitu ditugu. Kontzertu honetan, anime eta bideojokoetako kantu garrantzitsuenetako batzuk joko ditugu, asteburu horretan Euskalduna Jauregian sortuko den giro bereziari soinu banda jartzeko helburuarekin.

    Azokaren inguruko informazio gehiago izateko eta ospatuko diren ekintza guztiak ikusteko, elkartearen webgunean sar zaitezkete. Bestela, ekainaren 22an, arratsaldeko 18:00etan, Bilboko Euskalduna Jauregian ikusiko dugu elkar, manga eta anime munduko soinu banda onenak entzuteko.

    Behotsik

    , ,

  • Mozarten Requiem ederra joko dugu

    Mozarten Requiem ederra joko dugu

    Musika – Música 2019 jaialdian eman genuen kontzertu ederraren ondoren, ilusio berezia egiten digun berri bat daukagu zuei kontatzeko. Oraingo honetan, Galdakaoko Los Tonos Humanos ganbera abesbatzarekin batera, musikaren historiako obra garrantzitsuenetako bat interpretatzeko ohorea izango dugu, W. A. Mozarten Requiem ederra hain zuzen ere.

    Eta ez da erronka makala izango. Izan ere, Mozarten azken obraz ari gara, nahiz eta ez zuen berak bukatu, 1791ko abenduaren 5ean Vienan hil baitzen. Mozart, heriotzaren ideia burutik kendu ezinik, gaixotasunak ahulduta, framazoneriarekin zuen loturagatik naturaz gaindikoarekin sentikorra izanik, eta ordezkariaren itxurarekin harrituta, hau heriotzaren mezularia zela eta idatziko zuen requiema bere hiletarako izango zela sinesten bukatu zuen.

    Gurekin batera, aurretik lagun izan dugun Los Tonos Humanos ganbera abesbatza izango dugu. 1985ean sortua, abesbatza honek bere jarduera musikala XVI eta XVIII mendeen artean oinarritzen da. Errepertorio zabala dute, Errenazimenduko polifonista handietatik hasita, Buxtehude, Bach, Telemann edo Purcell bezalako musikari barrokoen lanetara heldu arte.

    Zuzendari lanetan, Joseba Berrocal izango dugu. Bilboko Goi Mailako Kontserbatorioan ikasi ondoren, Musikologia eta oboe barroko ikasketak burutu zituen. Orkestra, aldizkari eta disketxe desberdinekin kolaboratzen du konferentziak ematen eta testu eta programa-oharren argitalpenetan (BOS, Orquesta Nacional de España, Fundación March). Bitartean, instrumentista eta zuzendari moduan jarduten du antzinako musika talde desberdinekin.

    Joseba Berrocal

    Lan guzti honen emaitza maiatzean ikusteko aukera izango duzue emango ditugun bi kontzertuetan. Alde batetik, maiatzaren 12an Basaurin izango gaituzue, eta maitzaren 18an Basauriko San Migelen. Daten inguruko informazio gehiago izateko, adi ibili gure sare sozialetan tokien eta ordutegien berri izateko. Ez ezazue obra ikusgarri hau entzuteko aukera galdu, pena merezi du eta.

    Behotsik

    , , ,

  • Londresera bidaiatuko dugu Musika – Música 2019 jaialdian

    Londresera bidaiatuko dugu Musika – Música 2019 jaialdian

    Aurten ere badator Bilbao 700 Fundazioak antolatutako Musika – Música 2019 jaialdia, datorren otsailaren 28a eta martxoaren 3a artean Bilboko Euskalduna Jauregian ospatuko dena.

    Oraingoan, jaialdiak Londres eta New Yorkera bidaiatuko du XIX. eta XX: mendeen artean izandako dinamika kultural eta musikal sendoa bizitzeko, bere konposagile nagusienen bitartez: Holst, Britten, Gershwin edo Bernstein, besteak beste.

    Britainia Handiak, eta Londresek zehazkiago, ekarpen handiak egin dizkie Europako musika mugimenduei: Londresen hezitako konpositoreak XVIII. mendeko Europako tradizio klasikoen oinordekoak dira neurri batean, eta XIX. mendean nabarmen hedatu ondoren modu oso desberdinetan eboluzionatu dute XX. mendera iritsi arte.

    Bestalde, New York da hirietako hiria, globalizazioaren paradigma, horrek berekin dakarren identitate disoluzio edota integrazio guztiarekin. New York aukeratu badugu ez da izan musika munduan hamarkada batzuetan izan duen nagusitasunarengatik, baizik eta gaur egungo munduan gertatzen ari diren errotiko aldaketa sozio-kulturalen metafora eta ikurra delako.

    Behotsik Orkestrak martxoaren 3an kontzertua emango du Bilboko Euskalduna Jauregiko Kioskoan, 18:45ean. Oraingo honetan, Elgar eta Sullivanen doinuak dituen eta galdu ezin duzuen kontzertua prestatu dugu.

    Aritz Labrador zuzendari lanetan

    Aurreko urteetan bezela, kontzertu berezi honetarako zuzendari gonbidatua izango dugu, orkestrarentzat benetan erabilgarria eta interesgarria dena. Kasu honetan, Aritz Labrador musikari zornotzarra izango dugu zuzendari Musika – Música 2019 jaialdiko kontzertu honetan.

    Aritz Labradorrek (Zornotza, 1997) euskal musika eta folklorearen maitale moduan definitzen du bere burua. Bilboko Juan Crisóstomo de Arriaga Musika Kontserbatorioan egin zituen txistuko Maila Profesionaleko ikasketak Aitor Amilibia irakaslearekin. Churreko (Suitza) Laax International Session (2016) eta Berlineko Abenduko Europar Kontzertuan (2016) jo izan du txistua. Gaur egun, txistuko Goi Maila ikasten dabil Donostiako Musikene Kontserbatorioan, pianoko Maila Profesionaleko ikasketekin jarraitzen duen bitartean Donostiako Francisco Escudero Musika Kontserbatorioan.

    Horrez gain, zuzendaritza musikalean interesatu izan da beti, hainbat seminario eta kurtsotan parte hartu duelarik Arturo Tamayo, Margarita Lorenzo de Reizabal, Jan van der Roost, Jose Rafael Pascual-Vilaplana eta Franco Cesarini musikariekin. Gainera, Bilboko Disafinatti Ganbera Orkestrako zuzendaria eta Zornotzako Musika Bandaren zuzendari titularra da. Bilboko Operak antolatutako Gazteam / ABAO OLBE Proiektuaren antolatzailea ere bada 2018ko otsailaz geroztik.

    Behotsik

    , ,

  • Peru eta Otsoa Fair Saturday 2018an

    Peru eta Otsoa Fair Saturday 2018an

    Aurreko urteetan bezela, aurten ere datorren azaroaren 24an ospatuko den Fair Saturday 2018 egunean parte hartuko dugu. Oraingo honetan, familia osoarentzat pentsatua dagoen Peru eta Otsoa obra ezaguna interpretatuko dugu Bilboko Areatzan, eta, ongizatezko kontzertua izanik, egun horretan bildutako  diru guztia Ha Ha Tay – son risas de Gandiol GKEarentzat joango da.

    Fair Saturday artistek eta kultura-elkarteek garatutako kultura eta giza izaerako mugimendu globala da. Artista eta kultura-elkarte hauek azaroaren azken larunbatean modu masiboan jardungo dira ekitaldi bakoitzarekin GKE edo proiektu sozial bat bultzatuz.

    Orain arte Fair Saturdayren edizio internazionalena den honetan, guk ere mugak zabaldu nahi izan ditugu eta Senegalera mugitu gara Ha Ha Tay – son risas de Gandiol elkartearen bidez. Elkarteak Senegalgo iparraldean kokatutako Gandiol herriko garapen komunitarioa bultzatzeko lan egiten du. Zintzotasuna, duintasuna, gertutasuna eta pentsamendu askatasuna.

    Musika, balleta eta narrazioa

    Kontzertu berezi honetarako, eta orkestrak historiko izan duen elkarlanaren ideiarekin jarraituz, ez gara bakarrik egongo. Horregatik, musikaz gain, ikuskizuna balleta eta narrazioagaz indartuko dugu.

    Alde batetik, Serguéi Prokófiev musikari errusiarrak konposatutako akordeei mugimendua jartzeko, Ana Mª Aurrecoechea Balleta izango dugu gurekin. Beraien pausu eta dantzekin obrak gordetzen duen istorioa hobeto ulertzen lagunduko digute.

    Beste alde batetik, Peru eta Otsoaren istorioa kontatzeko, Alabazan narratzaile taldeko Joaquin Ponte Velon eta Pedro Ruiz narratzaileak izango ditugu, beraien ahots ederrekin, musikak kontatu ezin duena jakinarazteko.

    Gainera, Fair Saturdayk beti eman digun laguntzaz gain, aurten Garbikerrek parte hartuko du, kontzertu hau aurrera eramateko behar den azpiegitura guztiarekin lagunduz.

    Beraz, ez ezazu ikuskizun berezi hau bizitzeko aukera galdu, eta etor zaitez datorren azaroaren 24an egingo ditugun bi emanaldietara (12:00etan euskaraz eta 13:15ean gaztelaniaz), gure gizartean hain beharrezkoa den kultura bultzatzeko.

    Bilboko gazteen Balioak Martxan

    Aurten Bilboko Udalak antolatutako Balioak Martxan sarian parte hartu dugu. Bilbotarren egunerokoa hobetzeko asmoz, helburu sozial eta gizartearen beharrei erantzuten dieten ideiak izan dira Bilbao Gazte Balioak Martxan ekimenaren protagonistak. Izan ere, gazteen ikuspegitik, balioetan oinarritutako Bilbo bat indartu nahi du Udalak.

    Zorionez, sarituak izan gara aurkeztu genuen proiektuarekin, eta horren emaitza datorren azaroaren 24an emango dugun ikuskizuna izango da. #BEHoTSIKIrribarrezHAHATAY

    Behotsik

    , , , , ,