-
Dust In The Wind zuzenean Radio Euskadin
Pasa den otsailaren 3an, Unai Ibañez, Ioritz Madariaga eta Borja Mollá gure kideak, Radio Euskadiko Graffitira beraien asteroko bisitan, zuzenean jo zuten Kansas taldearen Dust In The Wind abestia Iker Gutierrez saioko bekadunarekin batera.
Egun berezia izan zen hura, agurren eguna. Alde batetik, Urko Aristiren azken eguna zen Graffitin, izan ere, EiTBko irrati taldeko zuzendariorde izendatu dute. Beste aldetik, Iker Gutierrezi irailetik hona Graffitin egoteko beka amaitu zaio eta bere azken astea zen Radio Euskadiko saioan.
Beraz, egun ezin aproposagoa zen zerbait berezia prestatzeko. Iker ahots eta gitarran, Unai gitarran, Borja bibolinean eta Ioritz pianoan, zuzenean jo zuten Kansas talde amerikarraren Dust In The Wind abestia.
-
Bohemiara bidaiatuko du Musika – Música 2017 jaialdiak
Pasa den urtarrilaren 20an Bilbao 700 Fundazioak Musika – Música 2017 jaialdia aurkeztu du, eta Behotsik Orkestrak aurten ere parte hartuko du Bilbo asteburu batez musikaren hiriburu bilakatzen duen jaialdi honetan.
Musika – Música jaialdiaren hamaseigarren edizio hau martxoaren 2an, 3an, 4an eta 5ean ospatuko da Bilboko Euskalduna Jauregian, eta BOHEMIA izenburupean, Gustav Mahler, Antonín Dvořák, Bedrich Smetana eta Leoš Janáček musikagileak izango ditu protagonista, Txekiar Errepublikako erregio horretakoak guztiak.
Oraindik ez da jaialdiko programa aurkeztu, baina aurreratu ahal dizuegu gure kontzertua otsailaren 3ko (ostirala) arratsaldean izango dela. Adi egon kontzertuari buruzko berri gehiago izateko.
BILBOKO BARRUTIETARA AUZOZ AUZO PROGRAMAREKIN
Aurreko edizioan hasitako Auzoz Auzo ekimenarekin jarraituko da, eta honen bitartez, Musika – Música Bilboko barruti guztietara helduko da otsailaren 2tik 23ra bitartean. Horretarako, kontzertu, tailer didaktiko, ikus-entzunezko emanaldi eta flashmob-ak antolatuko dira hiriko txoko desberdinetan.
Behotsik Orkestrak bere txanda izango du Auzoz Auzo programaren barruan otsailaren 10ean, arratsaldeko 19:00etan, Bilboko vialia ESTACIÓN ABANDO INDALECIO PRIETO geltokian egingo dugun flashmob berezi batean. Gainerako programa kontsultatu dezakezue ondorengo esteka honetan.
Bestalde, orkestrako hari laukote batek parte hartuko du, Barakaldoko Kontserbatorio eta Artebi Dantza Taldearekin batera, otsailaren 17an, arratsaldeko 18:00etan, Bilboko Europa Parkean antolatuko den ibildide musikalean.
ZUZENDARI GONBIDATUA MUSIKA – MÚSICA 2017 JAIALDIAN
Fair Saturday 2016an egin genuen bezela, orkestrak 5 urte betetzen dituen denboraldi berezi honen ospakizunarekin jarraituz, zuzendari gonbidatua izango dugu Euskalduna Jauregian eskeiniko dugun kontzertuan. Kasu honetan, Mikel Fernandez izango dugu zuzendari.
Mikel Fernandez, oinarrizko musika ikasketak Bilboko Juan Crisóstomo de Arriaga Kontserbatorioan burutu ondoren, Orkestra Zuzendaritza ikasten dabil Oviedoko “Eduardo Martínez Torner” Musika Goi Kontzerbatorioan, Merkataritza eta Marketing ikasketekin uztartuz.Gaur egun, Oviedoko “Eduardo Martínez Torner” Musika Goi Kontzerbatorioko ikasleek osotutako Proiektu-Orkestrako zuzendaria da eta hainbat kontzertu zuzenduko ditu otsailetik aurrera Madrilen Mozart Teogamentum Fundazioarekin. Bestalde, saxofoilari lanetan dabil Galdakaoko Musika Bandan eta “Princesa de Asturias” Fundazioko koruan tenor moduan abesten du.
-
Lokal berriaren inaugurazioa bazkideekin
Pasa den igandean, urtarrilaren 8a, gure lokal berriaren inaugurazioa ospatu genuen orkestrarentzako hain garrantzitsuak diren gure bazkideekin.
Hiru urte igaro dira Bilboko Arabella auzoan kokatuta dagoen lokala alokatu genuenetik, orkestrarentzako egoitza eta entsaiatzeko lekua izateko helburuarekin. Ahalegin ekonomiko garrantzitsu baten ondoren eta lan askoren ondoren, lokala erreformatu, txukundu, intsonorizatu eta entsaiatzeko prest dago, eta laster hasiko gara bertan lan egiten.
Baina guzti horren aurretik, guretzat hain garrantzitsuak diren eta modu guztiz eskuzabalean orkestra bultzatu eta laguntzen duten gure bazkideekin ospatu nahi genuen lokalaren inaugurazioarekin.
Estekatutako bideoan ikusi dezakezue inaugurazioaren arratsaldea izan zenaren laburpen txiki bat, baita lokala zeinen polita gelditu zaigun ere.
EGIN ZAITEZ BEHOTSIK ORKESTRAKO BAZKIDE
Gogoratu pasa den denboralditik aurrera Behotsik orkestra modu zuzenago batean lagundu ahal duzula eta orkestrako bazkide bihur zaitezkela.
Bazkide izateak hainbat abantaila ditu: orkestrak joko dituen programak proposatzea, kontzertuak ikusteko leku berezia, hileroko Newsletterra orkestraren azken berriekin, sarrera eta opari ezberdinen zozketak… eta beste hainbat gauza!
Bazkide bihurtzeko, bazkideen atalean sartu eta bertako formularioa betetzea baino ez duzu. Bertan duzu informazio guztia. Oso erraza da bazkide bihurtzea eta urteko 39€-ko kuota baino ez da ordaindu behar.
-
Lehoi Erregea zuzenean, A Disney Dream biran
Hona hemen pasa den ekainaren 19an Barakaldoko Barakaldo antzokian A Disney Dream biraren barruan eskaini genuen kontzertuko Lehoi Erregea filmeko soinu bandaren bideoa.
Behotsik Orkestra
Zuzendaria: Igor GiménezAbeslariak: María Barrado, Aitor Fernández
Dantzariak: Tropic Dance Dantza Eskola
Perkusioa: Miryam Ortiz, Enrique Castañeda, Egoitz Poza, Aintzane Corchado, Álvaro Luzuriaga
Antzezleak: Arteta Musika Eskola, Marta, Susana, Sergio, María, Paula
Atrezzoa: Rakel, Mari Jose, Ibon
Proiekzioa: Adriana González, Unai Ibañez, Ioritz Madariaga -
A Disney Dream birarekin Errioxara
Aurreko denboraldian egindako birak izan zuen arrakasta ikusita, Behotsik Orkestrak A Disney Dream birako kontzertu berria emango du abenduaren 18an Haroko Bretón de los Herreros Antzokian.
Ikuskizun honek, batez ere umeei zuzendua dagoena, baina edozein adineko publikoaren gozamenerako pentsatua, Walt Disney estudioek ekoiztutako film nagusien musika birpasatuko du, hala nola, Aladdin, Frozen eta Lehoi Erregea filmetakoak. Irudiek eta dantzak pelikuletako musika lagunduko dute.
A Disney Dream ikuskizunaren izaerak eta etortzear dauden gabonetako egun hauetan bereziki ospatzeak, kontzertua oso berezia izatea egingo dute, eta aukera paregabea izango da umeek primeran ibiltzeko eta bide batez, musikarengana hurbiltzeko.
Aurreko aldian bezela, guzti honetarako, Behotsik orkestraz gain, Tropic Dance dantza eskolako dantzariak, Arteta Musika Eskolako Paula Etxebarria, Susana Arteta eta Sergio Martínez antzezleak, María Barrado eta Aitor Fernández abeslariak, eta Miryam Ortiz, Enrique Castañeda, Egoitz Poza, Aintzane Corchado eta Álvaro Luzuriaga perkusio joleak izango ditugu lagun, proiektu itxaropentsu hau aurrera atera ahal izateko.
Lehenengo kontzertua Euskaditik kanpo
EuroCamerata nazioarteko gazte orkestrarekin egindako lanak Alemaniara eta Frantziara bidaiatzeak ahalbidetu digun arren, Behotsik Orkestra moduan Euskaditik kanpo emango dugun lehenengo kontzertua izango da.
Horregatik, orkestrarentzat ere kontzertu oso berezia izango da, Haro moduko udalerri batean eta 1841. urtean inauguratu zen Bretón de los Herreros moduko antzoki batean jotzeak suposatzen duen ardura dela eta.
Kontzertua 13:00ean izango da, eta sarrerak 5€-koak (3€ umeentzat) izango dira. Aurretik sarrerak erreserbatu ahal izango dira Haroko Kultura Udal Zentroan, eta bestela, kontzertua hasi baino ordu bat arinago salduko dira antzokiko txarteldegian bertan. 12:30ak baino lehen jaso ez diren erreserbatutako sarrerak salmentan jarriko dira.
